Das komische Leben

去燒野食既時候，佢地講起一個人最熟既朋友，應該係佢既男/女朋友，因為每個人既發展都會因為環境而改變。畢業後大家各就各路，環境唔同，有時會變得感覺話不投機。當中亦有人唔同意。我覺得，可能兩個講法都有佢既道理。 如果講起我最熟既中學同學，中三移左民去美國，大家一直都可以保持聯絡。兩年前我係美國見佢，o係車上面我真係諗唔倒有的乜野想講(當然我都係一個冇乜野講既人)，但係夜晚訓覺，聽日要七點起身，大家一樣可以講到零晨四點，感覺好好。從中學到而家我都覺得佢獨立，當然佢去左美國所遇到既事，並唔係我所可以理解。例如：點解每次見面或者寫信都係問我有冇認識一o的 "cute guys"... :p 又當大家講開，返屋企見倒o的親朋戚友，大家都係講返工有幾忙碌，點樣儲錢買樓等等。好似大家都唔會明白，點解呢班人係外國讀書，讀黎讀去都讀唔完，又唔知讀乜，只係成日去旅行，好似唔駛做咁 (呢個感覺一定係中外都一樣，因為荷蘭佬都同我咁樣講過...)。我覺得：哈哈，一矢中的!!! 如果佢地明白我地呢班人諗乜，而家佢地就圍埋食飯啦，點會o係屋企... 畢竟世界上面係有不同性格既人 ，冇話乜野係唯一正確既生活模式。 另一怪事係我講我覺得最古怪既諗法既時候，居然法國佬都係咁諗。但係呢個感覺只係維持左六個月，而家佢係澳門尋找佢既新生活o既時候我唔係香港，我下星期去巴黎既時候佢唔係貝蒂納。人既際遇就係非常古怪... 跟住而家冇啦啦走個美國佬黎土賓根讀德文，佢同我講既每一個話題，都可以俾我一兩句講到大家冇野講，大家話不投機既情度差唔多满分 :D。最邪既係佢班成百人，呢度有咁多個 HALL，唔知點解佢會住左係我樓下!!! 今日仲邪，朝早搭巴士撞倒佢 (佢唔知我認得佢 :p)，跟住我個日本朋友[1] o係度同我講 Sommer Academie[2]，去 paris[3] 等 (即係我同佢提過既 1, 2, 3 都出齊)。除非佢O的德文太差，聽唔明我地講乜，如果唔係佢實知道今日同我同一班車... 有時覺得：我因為咁多個巧合黎左土賓根，發生各種怪事，其實係咪每個人都有自己既命運，有時諗咁多我要點點點，其實都係冇乜用... :p 法國佬親眼見倒佢朋友比人"吉"而後去左。美國佬去湖北傳教遇到公安拉人再被人拉埋。相比之下，我既歷險記其實都係好小兒科... 再講以前法國佬話佢發夢：佢同佢o的鄉親講話佢黎香港，佢黎搵我[1]，係一間酒吧 [2] 見倒我，但係我唔認得佢 [3]。以前覺得 1, 2, 3 都冇可能，因為佢黎香港實會同我單聲，唔駛搵又冇理由會唔認得。我又唔飲酒，點會見倒我o係酒吧... 但係我而家覺得，去完德國又唔係咁講... :P